"რუსეთ-საქართველოს დაახლოებამ შესაძლოა, სამხრეთ ოსეთის ან აფხაზეთის საქართველოსთვის ჩაბარება გამოიწვიოს" - რას ამბობს ცხინვალის ე.წ. პრეზიდენტის მრჩეველი

"რუსეთ-საქართველოს ურთიერთობის "დათბობამ“ შესაძლოა, საკმაოდ ხანგრძლივი ხასიათი და მეტიც, ქვეყნებს შორის ურთიერთობის უფრო თბილი მოდელის სახე მიიღოს", - ასე ფიქრობს ოკუპირებული ცხინვალის რეგიონის ე.წ. პრეზიდენტის "სახელმწიფო მრჩეველი", პოლიტოლოგი ვიაჩესლავ გობოზოვი.

• აღნიშნულ თემაზე გობოზოვმა გაზეთ "სამხრეთ ოსეთთან" ინტერვიუში ისაუბრა.

"რუსეთსა და საქართველოს შორის ურთიერთობის მორიგი "დათბობის“ მიზეზი პირველ რიგში გახდა ოფიციალური თბილისის ნეიტრალიტეტი მოსკოვისა და სპეციალური სამხედრო ოპერაციის მიმართ. თანაც, თბილისისა და მოსკოვის მორიგი დაახლოება, წინასთან შედარებით, უკვე არა მყიფე დეკლარაციებია, არამედ, დინამიურად განვითარებადი პოლიტიკური პროცესი“, - ამბობს პოლიტოლოგი.

• გობოზოვის თქმით, მოსკოვისა და თბილისის ურთიერთობის გაუმჯობესებამ, შესაძლოა, ე.წ. სამხრეთ ოსეთისა და აფხაზეთის "ეროვნულ ინტერესებს" საფრთხე შეუქმნას.

"ჰიპოტეთურად, დაახლოებამ შესაძლოა, სამხრეთ ოსეთის ან აფხაზეთის "ჩაბარება“ გამოიწვიოს“, - ამბობს გობოზოვი.

ამასთან, გობოზოვის აზრით, უფრო მეტია შანსი, რომ მოსკოვი "არ ჩააბარებს აფხაზეთსა და სამხრეთ ოსეთს საქართველოს",

"ყარაბაღის სცენარის“ კომენტირებისას, ე.წ. სახელმწიფო მრჩეველმა ხაზი გაუსვა, რომ პირველად პოსტსაბჭოთა სივრცეში "არაღიარებული“ ან "ნაწილობრივ აღიარებული“ რესპუბლიკის საკითხი გადაწყდა ძალოვანი, სამხედრო გზით.

"სამხრეთ ოსეთისა და აფხაზეთისთვის ამ რთულ ვითარებაში საგანგებოდ მნიშვნელოვანია, რომ მითიური საფრთხეები, რეალური გამოწვევებისგან განვასხვავოთ, რათა მაქსიმალურად ეფექტიანად ვიმოქმედოთ, შესაძლო ნეგატიური შედეგები გავანეიტრალოთ და სიტუაციიდან კონკრეტული დივიდენდები მივიღოთ“, - დაამატა მან.

ავტორი: ანრი კურტანიძე